മിനി ഊട്ടിയിൽ കോഴിക്കോട് കോർപ്പറേഷനിലെ മാലിന്യങ്ങൾ തള്ളിയതായി പരാതി; അന്വേഷണം ആവശ്യപ്പെട്ട് ഗ്രാമ പഞ്ചായത്ത്

                                              

വേങ്ങര: മിനി ഊട്ടിയിൽ വലിയ തോതിൽ അജൈവമാലിന്യം തള്ളിയ സംഭവത്തിൽ അന്വേഷണം ആവശ്യപ്പെട്ട് ഊരകം ഗ്രാമപഞ്ചായത്ത് അധികൃതർ രംഗത്ത്. പൊതുജനാരോഗ്യത്തിന് ഭീഷണിയാകുന്ന രീതിയിൽ മാലിന്യം നിക്ഷേപിച്ചത് രാത്രിയുടെ മറവിലാണെന്ന് പഞ്ചായത്ത് അധികൃതർ പറഞ്ഞു.

മിനി ഊട്ടിയിലെ ജാമിയാ അൽഹിന്ദ് അൽ ഇസ്ലാമിയ പള്ളിയുടെ എതിർവശത്തെ സ്ഥലത്താണ് മാലിന്യക്കൂമ്പാരം കണ്ടെത്തിയത്. പരിശോധനയിൽ, കോഴിക്കോട് കോർപ്പറേഷനിലെ ഹരിതകർമ്മ സേന ഉപയോഗിക്കുന്ന 'അഴക്' എന്ന് രേഖപ്പെടുത്തിയ ചാക്കുകളും കണ്ടെത്തി. ഇതോടെ, മാലിന്യം കോഴിക്കോട് കോർപ്പറേഷനിൽ നിന്നാണ് വന്നതെന്നാണ് പഞ്ചായത്ത് അധികൃതരുടെ പ്രാഥമിക നിഗമനം.

സംഭവത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്ന് ആവശ്യപ്പെട്ട് ഊരകം ഗ്രാമപഞ്ചായത്ത് സെക്രട്ടറി വേങ്ങര പോലീസിലും, ജില്ലാ പോലീസ് മേധാവിക്കും, മലപ്പുറം തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ, ജില്ലാ ശുചിത്വമിഷൻ കോർഡിനേറ്റർ എന്നിവർക്കും പരാതി നൽകി.

ജില്ലയുടെ പ്രധാന വിനോദസഞ്ചാര കേന്ദ്രമായ മിനി ഊട്ടിയിൽ മാലിന്യം തള്ളിയത് ഗുരുതരമായ സാമൂഹിക വിരുദ്ധ പ്രവർത്തനമായിട്ടാണ് കണക്കാക്കുന്നത്. ഇത് പ്രദേശവാസികളുടെ ആരോഗ്യത്തിനും ടൂറിസത്തിനും വലിയ വെല്ലുവിളിയാകുന്നുണ്ട്.